ئەمڕۆ (٢٩ی نیسان) بە ئامادەبوونی جەلال شێخ نوری سەرپەرشتیاری ئیدارەی گەرمیان و قایمقامی قەزای کفری و بەڕێوەبەری گشتی شارەوانیەکانی گەرمیان و بەڕێوەبەری فەرمانگە حکومیەکانی کفری بەردی بناغەی پرۆژەی گەڕەکی راپەرین لە قەزای کفری دانرا.

لەکۆنگرەیەکی رۆژنامەوانیدا، جەلال شێخ نوری سەرپەرشتیاری ئیدارەی گەرمیان رایگەیاند، ئەمرۆ یەکێک لەو پرۆژانەی کە بەڕێز کاک قوباد جێگری سەرۆکی حکومەت بەڵێنی دابوو بەجێبەجێکردنی، چووە بواری جێ بەجێکردنەوە ئەویش پرۆژەی ڕیگاسازی گەڕەکی ڕاپەڕینە لە قەزای کفری، دیارە ئەمە سەرەتای دەستپیکردنی پرۆژەکان دەبێت.

ووتیشی، جگە لەم پرۆژەیە کە یەکێک بووە لە داواکاریەکانی قەزای کفری، هۆڵی داخراوی وەرزشیش هەیە لە قەزاکە کەکارکردن تییدا بەردەوامەو دوای سەردانەکەی بەڕێز جێگری سەرۆکی حکومەت بۆ کفری بودجەی پێویستی بۆ دابین کراوە بۆ ئەوەی تەواو بکرێت.

هاوکات بەمەبەستی ئاگاداربوون لە چۆنیەتی بەڕێوەچوونی کارەکان، سەرپەرشتیاری ئیدارەی گەرمیان پرۆژەی هۆڵی داخراوی وەرزشی کفری بەسەرکردەوە و جەختیشی کردەوە ئیدارەی گەرمیان هاوکار و پشتیوان دەبێت بۆ چارەسەرکردنی هەر کێشە و گرفتێک رێگر بن لە جێبەجێکردنی پرۆژەکە.