حكومه‌تی هه‌رێمی كوردستان هه‌ر له‌سه‌ره‌تای نه‌وه‌ده‌كانه‌وه‌ پێی باش بووه‌ گه‌رمیان بكرێت به‌ پارێزگا، به‌ڵام ئه‌وكات به‌هۆی ناڕوونی چاره‌نوسی پارێزگای كه‌ركوك و نه‌گه‌ڕانه‌وه‌ی بۆ سه‌ر سنوری هه‌رێمی كوردستان، پرۆژه‌یه‌كی له‌و جۆره‌ ئیمكانی جێبه‌جێكردنی نه‌بوو، چونكه‌ زۆركه‌س پێیان وابوو له‌حاڵه‌تی به‌ پارێزگاكردنی گه‌رمیاندا، واته‌ كورد ده‌ست به‌رداری به‌شێك له‌ خاكی كه‌ركوك بووه‌، بۆیه‌  له‌لایه‌ن حكومه‌تی هه‌رێمی كوردستانه‌وه‌ به‌شێوه‌یه‌كی كاتی  پارێزگای كه‌ركوك كه‌  قه‌زاكانی (كه‌لار، كفری، چه‌مچه‌ماڵ‌، ده‌ربه‌ندیخان، به‌شێك له‌ ناحییه‌كانی قه‌زای خانه‌قین) ده‌گرته‌وه‌ پێكهێنرا. له‌گه‌ڵ پێكهێنانی پارێزگاكه‌شدا به‌هۆی نه‌بوونی بینا بۆ فه‌رمانگه‌ و به‌رێوه‌به‌رایه‌تییه‌كان له قه‌زای ‌كه‌لار، قه‌زای ده‌ربه‌ندیخان دیاریكرا بۆ ناوه‌ندی پارێزگای كه‌ركوك.

دوای ڕووخانی ڕژێمی پێشووی عێراق له‌لایه‌ن ئه‌مریكاو هاوپه‌یمانه‌كانییه‌وه‌ له‌ساڵی 2003دا، جارێكی تر گه‌رمیان كه‌ قه‌زای كه‌لار مه‌ركه‌زه‌كه‌یه‌تی تووشی بۆشاییه‌كی ئیداری هات، ئه‌وه‌ش به‌هۆی هه‌ڵوه‌شاندنه‌‌وه‌ی پارێزگای كه‌ركوك له‌ ده‌ربه‌ندیخان، بۆ چاره‌سه‌ركردنی ئه‌و بۆشاییه‌ ئیدارییه‌ش ئه‌نجومه‌نی وه‌زیرانی هه‌رێمی كوردستان به‌ بڕیارێك له‌ رۆژی 6/8/2006 ئیداره‌ی گه‌رمیانی پێكهێنا كه‌ مه‌ركه‌زه‌كه‌ی له‌ قه‌زای كه‌لار دانراوه‌، هه‌روه‌ها له‌ پێناو كاراكردنی ئیداره‌كه‌ و فراوانكردنی ده‌سه‌ڵاته‌ كاڕگێڕییه‌كانی، حكومه‌تی هه‌رێم له‌ ساڵی 2008 بڕیاریدا ئیداره‌ی گه‌رمیان هاوشێوه‌ی پارێزگاكانی تری هه‌رێم مامه‌ڵه‌ی له‌گه‌ڵدا بكرێت و له‌و رووه‌شه‌وه‌ ده‌سه‌ڵاتی پارێزگار به‌ خشراوه‌ته‌ سه‌رپه‌رشتیاری ئیداره‌كه‌.

له‌ئێستادا، ئیداره‌ی گه‌رمیان پێكهاتووه‌ له‌هه‌ریه‌كه‌ له‌قه‌زاكانی(كه‌لار، كفری، به‌شێك له‌ 

ناحیه‌كانی قه‌زای خانه‌قین).