ئەمڕۆ (٦ی حوزەیران) بە سەرپەرشتی وەزیری ناوخۆیی حکومەتی هەرێم و بە ئامادەبوونی پارێزگارەکان و سەرپەرشتیاری ئیدارەی گەرمیان و ئیدارەی سۆران و به‌رێوه‌به‌ری گشتی دیوانی وه‌زاره‌تی ناوخۆ و ژمارەیەکی دیکە لە بەرپرسان، کۆبوونەوەیەکی فراوان لەگەڵ شاندی کۆماری ئیسلامی ئێران بەڕێوەچوو.

شاندی كۆماری ئیسلامی ئێران پێکهاتبوو لە پارێزگارەکانی ئورمیە و سنە و کرماشان و ژمارەیەک لە پەرلەمانتاران و هەردوو سەرکونسڵی ئێران لە هەولێر و سلێمانی.

لە کۆبوونەوەیه‌كدا ئاماژە بە گرنگیی بره‌ودان به‌ پەیوەندییە سیاسییەکانی نێوان هەرێمی کوردستان و ئێران کرا و تیشكخرایه‌ سه‌ر دوایین سەردانی شاندی باڵای هەرێمی کوردستان بۆ پرسەی خولێخۆشبوو ئیبراهیم ره‌ئیسی سەرۆککۆماری ئێران و یاوەرانی و گەیاندنی سەرەخۆشی خه‌ڵكی هه‌رێمی كوردستان، شانده‌كه‌ ئەو هەنگاوەیان بە گرنگ وەسفکرد.

هه‌روه‌ها تیشكخرایه‌ سه‌ر په‌یوه‌ندیی مێژوویی نێوان هه‌رێمی كوردستان و كۆماری ئیسلامی ئێران و قۆناغه‌كانی ئه‌و په‌یوه‌ندییه‌ و هه‌ماهه‌نگییه‌ به‌رده‌وامه‌كان بۆ پرسه‌ هاوبه‌شه‌كانی نێوان هه‌ردوولا.

هه‌ردوولا هیوایانخواست په‌یوه‌ندییه‌كان له‌ بواره‌كانی ئابووری و بازرگانی بره‌وی زیاتریان پێبدرێت، كه‌ له‌ ئێستادا ئاستی بازرگانی نێوان هه‌ردوولا گه‌یشتووه‌ته‌ نزیكه‌ی یه‌ك ملیار دۆلار.

له‌ ته‌وه‌رێكی دیكه‌ی كۆبوونه‌وه‌كه‌دا‌، تاووتوێی هاتنی زیاره‌تكارانی ئێران له‌ رێگه‌ی هه‌رێمی كوردستانه‌وه‌ بۆ نه‌جه‌ف و كه‌ربه‌لا كرا و دڵنیایی درا، وەک ساڵانى ڕابردوو هەموو ئامادەکاریی و ئاسانکارییەک ده‌كرێت بۆ پێشوازییکردن له‌ زیاره‌تكاران ، وەک دابینكردنی شوێنی حه‌وانه‌وه‌‌ و خواردن و خزمه‌تگوزارییه‌ گشتییه‌كان و دواتر گواستنه‌وه‌یان بۆ شوێنه‌ پیرۆزه‌كان له‌ باشووری عێراق.