ئەمڕۆ (٢٨ی ئابی ٢٠٢٤) فەرماندەی فیرقەی چواری هێزەکانی پێشمەرگە بە یاوەری شاندێک لە فەرماندە و ئەفسەران سەردانی ئیدارەی گەرمیانی کرد و لەلایەن سەپەرشتیاری ئیدارەی گەرمیانەوە پێشوازی لێکرا.

لە دیداری نێوانیان کە جێگری سەرپەرشتیاری ئیدارەی گەرمیان بۆ کاروباری کارگێڕی ئامادەی بوو، سەبارەت بە بارودۆخی ئەمنی ناوچە کوردستانیەکانی هاوسنوری ئیدارەی گەرمیان و رۆڵی هێزەکانی پێشمەرگە لە پاراستنی سنورەکان گفتوگۆکرا.

لەو دیدارەدا، لیوا روکن زاتیار حسن زوبێر فەرماندەی فیرقەی چواری هێزەکانی پێشمەرگە ئەوەی خستەڕوو، ناوچە کوردستانیەکانی هاوسنوری ئیدارەی گەرمیان لەئێستادا لە ژێر کۆنترۆڵی هێزەکانی پێشمەرگەدایە و کاریش دەکەن بۆ ئەوەی سنورەکان زیاتر تۆکمە بکەن.

لەبەرامبەردا، جەلال شێخ نوری سەرپەرشتیاری ئیدارەی گەرمیان، رۆڵی هێزەکانی پێشمەرگەی لە پاراستنی سنورەکاندا بەرز نرخاند و ئامادەیی ئیدارەی گەرمیانی پیشاندا بۆ هاوکاریکردن و دابینکردنی پێداویستیەکانی هێزەکانی پێشمەرگە لە سنورەکەدا.