ئەمڕۆ (١٠ی تشرینی یەکەمی ٢٠٢٤) بەئامادەبوونی جەلال شێخ نوری سەرپەرشتیاری ئیدارەی گەرمیان و قایمقامی قەزای کفری و بەڕێوەبەری گشتیی کارەبای گەرمیان و شارەوانیەکانی گەرمیان و بەڕێوەبەری ناحیەی ئاوەسپی و ژمارەیەک لە هاوڵاتیانی سنورەکە، لە گوندی قولیجانی حاجی ئەمین سەربە ناحیەی ئاوەسپی، رێورەسمی تایبەت بە گەیاندنی کارەبا بە ٢٤ گوندی سنوری ئیدارەی گەرمیان بەڕێوەچوو.

پرۆژەکە لەسەر راسپاردەی بەڕێز (قوباد تاڵەبانی) جێگری سەرۆکی ئەنجومەنی وەزیران و بەسەرپەرشتی ئیدارەی گەرمیان، لەلایەن بەڕێوبەرایەتی گشتی کارەبای گەرمیانەوە جێبەجێدەکرێت و کارکردن تیایدا بەردەوامە.

پرۆژەکە بە گوژمەی ٣ ملیار و ٥٠٠ ملیۆن دینار لەسەر بودجەی وەبەرهێنانی وەزارەتی کارەبا ساڵی رابردوو چوەتە بواری جێبەجێکردن و لەماوەی رابردوودا ١١ گوندی تەواو بووە و ئەمڕۆش هەشت گوندی تر کارەبای پێگەیشت، لەئایندەیەکی نزیکیشدا ئەو پێنج گوندەی دەمێنێتەوە کارەبای پێدەگات.