ئەمڕۆ (٣ی ئازاری ٢٠٢٥) لە رێوەڕەسمێکدا، سەرپەرشتیاری ئیدارەی گەرمیان بەئامادەبوونی جێگرانی سەرپەرشتیار و بەڕێوەبەرە گشتییەکان، خەڵاتی رێزلێنانی بەخشییە قایمقامی پێشووی کەلار و بەڕێوەبەری گشتی پێشووی پەروەردەی گەرمیان و بەڕێوەبەری پێشووی پۆستە و گەیاندنی گەرمیان، ئەمەش دوای خانەنشین بوونیان.

لە مەراسیمەکەدا، جەلال شێخ نوری سەرپەرشتیاری ئیدارەی گەرمیان رایگەیاند، هەریەکە لەم بەڕێزانە کە ئێستا خانەنشین بوون، لە ماوەی ساڵانی رابردوودا سەرەڕای قەیرانی دارایی و کێشە و گرفتە جۆر بەجۆرەکان، لە بواری کارکردنی خۆیان خزمەتی باشیان کردووە و جێگەی دەستیان دیارە لە سنورەکە، بۆیە پێمان باش بووە بە ئاڕاستەکردنی خەڵاتی رێزلێنان، رێز لە خزمەت و هەوڵ ماندووبونیان بگرین و هیوای سەرکەوتنیانیشیان بۆ دەخوازین.

لای خۆشیانەوە، هەریەکە لە قایمقامی پێشووی قەزای کەلار و بەڕێوەبەرەکانی پپێشووی پەروەردە و پۆستە و گەیاندن، سوپاسی سەرپەرشتیاری ئیدارەی گەرمیانیان کرد لە بەرامبەر هاوکاری و پشتیوانی بەردەوامی بۆیان، هاوکات سوپاسی دامودەزگاکانی سنورەکەیان کرد کە لە ماوەی ساڵانی کارکردنیاندا هاوکار و پشتیوانیان بوون.