ئەمڕۆ (٢١ى کانوونى دووەم) لە مەراسیمێکدا بە ئامادەبوونى سەرپەرشتیارى ئیدارەىى گەرمیان و بەڕێوەبەرى ئاوى دەوروبەرى گەرمیان، پرۆژەى گواستنەوەى ئاوى خواردنەوە لە رووبارى سیروانەوە بۆ گوندى زەماوەنگە و پرۆژەى ئاوى گوندەکانى (ژاڵەى سەفەر، سەید خەلیل دەروێش، گەرمکى حاجى عەلى) کرایەوە.

لەمیانى بەڕێوەچوونى رێورەسمەکەدا و لە کۆنگرەیەکى رۆژنامەوانیدا جەلال شێخ نورى سەرپەرشتیارى ئیدارەى گەرمیان ئەوەى خستەڕوو، خزمەتکردنى گوندەکان لە رووى رێگاو بان و ئاو و سێکتەرەکانى تر دەستیپێکردووە و بەردەوامیش دەبێت.

ووتیشى، لەماوەى ساڵانى رابردوودا کێشەى نەختینەى داراییمان هەبوو بۆ پرۆژەکانى سنورەکە، لە دواى ئەوەى بەڕێز قوباد تاڵەیانى بودجەى تایبەتى تەرخانکرد و بەهاوکارى بەڕێوەبەرى گشتى بانکى ناوەندى لە سلێمانى توانیمکان ژمارەیەکى زۆر پرۆرژە لە گەرمیان تەواو بکەین و بیخەینە خزمەتى هاوڵاتیان.

هاوکات، سەرپەرشتیارى ئیدارەى گەرمیان، لە گوندى زەماوەنگە ماڵى چەند هاوڵاتیەکى نەخۆشى بەسەرکردەوە و لەمیانى لەنزیکەوە بینینى هاوڵاتیانى گوندەکە جەختى لەوە کردەوە ئیدارەى گەرمیان بە گرنگیەوە لەسەرجەم گوندەکان دەڕوانێت و هەوڵى تەواو دەدات بۆ خزمەتکردنیان.