ئەمڕۆ (٢٣ی ئاب) بەئامادەبوونی ژمارەیەک لەپەرلەمانتارانی عێراق و کوردستان و سەرۆکی زانکۆی گەرمیان و سەرۆکی یەکەی ئیداری و ژمارەیەک لەبەرێوەبەری گشتی و بەڕێوەبەرایەتیەکان و ئەکادیمستان و سەندیکا و رێکخراوەکان و چالاکانی کۆمەڵی مەدەنی، لەسەر پرسی کردنەوەی زانکۆی پۆلیتەکنیکی گەرمیان کۆبوونەوەیەک لەدیوانی ئیدارەی گەرمیان بەڕێوەچوو.

لە سەرەتای کۆبوونەوەکەدا، جەلال شێخ نوری سەرپەرشتیاری ئیدارەی گەرمیان، باسی لەگرنگی زانکۆی پۆلیتەکنیک بۆ گەرمیان کرد و پشتیوانی ئیدارەی گەرمیان و تەواوی فەرمانگەکانی حکومەتی بۆ کردنەوەی زانکۆکە دوپاتکردەوە.

ووتیشی، ئێمە سوپاسی وەزارەتی خوێندنی باڵا دەکەین بۆ پەسەندکردنی پرۆپۆزەڵی زانکۆی پۆلەتەکنیک و هەوڵ و ماندووبونی هەموو ئەو کەس و لایەنانە بە گرنگ دەزانین لەسەر ئەو پرسە، لێرەشەوە داواکارین رێکارەکانی کردنەوەی ئەم زانکۆیە لە ئەنجومەنی وەزیرانەوە تەواوبکرێت و بخرێتە خزمەتی سنورەکەمان.

دواتر، د.چیا محمەد راگری کۆلێژی تەکنیکی کەلار باسی لە رێکارەکانی کردنەوەی زانکۆی پۆلیتەکنیکی گەرمیانی کرد و گرنگی زانکۆی پۆلیتەکنیکی گەرمیانی بۆ سنورەکە خستەڕوو، ئەوەشی دووپاتکردەوە، لە ئێستادا کۆلێژی تەکنیکی کە پێشتر لە ساڵی ١٩٩٥وە پەیمانگای تەکنیکی بووە ئامادەیی تەواوی هەیە بکرێتە زانکۆیەکی پۆلیتەکنیک لەگەرمیان.

دوپاتیشیکردەوە، کردنەوەی ئەم زانکۆیە رۆڵی دەبێت لە پێگەیاندنی کادری تەکنیککار و بەوەش بەشداری گەورەی دەبێت لە بوژانەوەی ژێرخانی ئابووری لە گەرمیاندا.

دوابەدوای ئەوەش هەریەکە لە پەرلەمانتاران و سەرۆکی زانکۆی گەرمیان و سەرۆکی یەکەئیدارییەکان و بەڕێوەبەری بەڕێوەبەرایەتیەکان و نوێنەری رێکخراو و سەندیاکاکان و چالاکوانان و ئامادەبوانی کۆبوونەوەکە، پشتیوانی خۆیان بۆ کردنەوەی زانکۆی پۆلیتەکنیکی گەرمیان دوپاتکردەوەو دواتر گفتوگۆی کراوە لەسەر پرسی کردنەوەی زانکۆکە کرا و سەرنج و تێبینی و پێشنیار لەسەر بابەتەکە خرایەڕوو.

دوابەدوای ئەوەش لە کۆنگرەیەکی رۆژنامەوانیدا پشتیوانی هەمەلایەنە بۆ کردنەوەی زانکۆی پۆلیتەکنیکی گەرمیان دوپاتکرایەوە و داواکرا ئەنجومەنی وەزیران رێکارەکانی کردنەوەی زانکۆکە پەسەند بکات و بخرێتە خزمەتی سنورەکە.