ئەمڕۆ (٤ی ئازار) سەرپەرشتیاری ئیدارەی گەرمیان بە ئامادەبوونی بەڕێوەبەری گشتی کاروباری شەهیدان و ئەنفالکراوانی گەرمیان، پێشوازیکرد لە لیژنەی تایبەت بە وەرگرتنی سامپڵ لە کەسوکاری ئەنفالکراوانی گەرمیان بەمەبەستی ئەنجامدانی پشکنینی (DNA).

لەو دیدارەدا، جەلال شێخ نوری سەرپەرشتیاری ئیدارەی گەرمیان، تیشکی خستەسەر تاوانی ئەنفال و جینۆسایدیکردنی هاوڵاتیانی گەرمیان بە تایبەتی و کوردستان بە گشتی، هاوکات باسی لە هەوڵەکانی سەرۆکایەتی کۆماری عێراق و خاتوو شاناز ئیبراهیم ئەحمەد خانمی یەکەمی عێراق کرد بۆ دۆزینەوە و هێنانەوەی روفاتی ئەنفالکراوان. راشیگەیاند، ئێمە لە ئیدارەی گەرمیان بە گرنگیەوە لە هاتنی ئەم لیژنەیە دەڕوانین بۆ گەرمیان و هەماهەنگ و هاوکاریان دەبین بەمەبەستی ئەنجامدانی کارەکانیان بەشێوەیەکی سەرکەوتوانە.

هاوکات، نوێنەری گۆڕە بەکۆمەڵەکانی سەر بە دامەزراوەی شەهیدانی عێراق و نوێنەری پزیشکی دادوەری حکومەتی عێراق، باسیان لە ووردەکاری کارەکانیان کرد و ئەوەیان خستەڕوو، تیمەکەیان خۆی دەبینێتەوە لە پسپۆرییە جیاوازەکان و ماوەی دوو رۆژە لە ناحیەی رزگاری کاردەکەن و سامپڵی خوێن و بەڵگەنامەی پێویست لە واریس و کەسوکاری ئەنفالکراوانی گەرمیان وەردەگرن، لەچەند رۆژانی داهاتووشدا کارەکانیان بەردەوام دەبێت بە ئامانجی دۆزینەوەی روفاتی کەسوکاریان.