ئەمڕۆ (٦ی ئابی ٢٠٢٤)بەبۆنەی بەدەستهێنانی پلەی سێیەم لەسەر ئاستی عێراق و پلەی یەکەم لەسەر ئاستی هەرێمی کوردستان لە پاڵەوانێتی موای تای لاوانی عێراق، لە مەراسیمێکدا لەلایەن سەرپەرشتیاری ئیدارەی گەرمیانەوە بە وەکالەت خەڵاتی رێزلێنان بەخشرایە تیمی موای تای یانەی وەرزشی کەلار.

لە مەراسیمەکەدا، رامیار عەبدولڕەحمان سەرپەرشتیاری ئیدارەی گەرمیان، وێڕای ئەوەی پیرۆزبایی ئەم سەرکەوتنەی لە تیمی موای تای یانەی وەرزشی کەلار کرد، هیوای سەرکەوتنی زیاتری بۆ تیمەکە و یانە و تیپ و وەرزشوانانی دیکەی سنوری ئیدارەی گەرمیان خواست.

راشیگەیاند، ئیدارەی گەرمیان وەک هەمیشە هاوکار دەبێت بۆ وەرزشوانانی سنورەکە بە ئامانجی بەدەستهێنانی ئەنجامی باش و خزمەتکردن بە بواری وەرزش شانبەشانی بوارەکانی تر.

لای خۆشیەوە راهێنەری تیمی موای تای یانەی کەلار، سوپاسی ئیدارەی گەرمیانی کرد بۆ خەڵاتەکەی و جەختی کردەوە لە بەردەوامی هەوڵەکانیان بۆ بەدەسهێنانی ئەنجامی باشتر و برەودان بە وەرزشی موای تای لە گەرمیان.