ئێوارەی ئەمڕۆ (١٣ی تشرینی دووەمی ٢٠٢٤) بە ئامادەبوونی جەلال شێخ نوری سەرپەرشتیاری ئیدارەی گەرمیان و عارف عادل جێگری سەرپەرشتیاری ئیدارەی گەرمیان بۆ کاروباری کارگێڕی و بەرپرسانی باڵای حزبی و حکومی و ژمارەیەک لە مامۆستایانی ئاینی و کەسایەتی سنورەکە، لە ژێر دروشمی (مامۆستا حەمە ئەمین قامەتێکی بەرز) لە هۆڵی بەڕێوەبەرایەتی گشتی رۆشنبیری گەرمیان، یادی ژیانئاواییکردنی مامۆستا مەلا حەمەئەمین کەلاری بە چەند چالاکیەک کرایەوە.

مامۆستا حەمە ئەمین کەلاری، سەرۆکی لقی گەرمیانی یەکێتی زانایانی ئاینی ئیسلامی کوردستان و ووتاربێژ و پێشنوێژی مزگەوتی گەورەی کەلار و کەسایەتی دیاری ئاینی و کۆمەڵایەتی گەرمیان، ٣٨ رۆژ پێش ئێستا کۆچی دواییکرد ئەمڕۆش وەک رێزلێنانێک لە کار و خزمەتەکانی مەراسیمێکی تایبەتی بۆ ئەنجامدرا.