ئەمڕۆ (١٤ی تشرینی دووەمی ٢٠٢٤) سەرۆکی یەکێتی هاوردە و ناردنکارانی کوردستان بەیاوەری لێپرسراوی لقی گەرمیانی یەکێتیەکەیان و شاندێک، سەردانی ئیدارەی گەرمیان کرد و سەرپەرشتیاری ئیدارەی گەرمیان بە ئامادەبوونی جێگری سەرپەرشتیار بۆ کاروباری کارگێڕی پێشوازی لێکرد.

لە دیداری نێوانیان سەرۆکی یەکێتی هاوردە و ناردنکاران سوپاسی سەرپەرشتیاری ئیدارەی گەرمیانی کرد بۆ هاوکاری و هەماهەنگی لەگەڵ لقی گەرمیانی یەکێتیەکەیان و هەوڵەکانی ئیدارەی گەرمیان بۆ باشتر بەرێوەپێشچوونی کەرتی بازرگانی لەسنورەکە.

لای خۆشیەوە، جەلال شێخ نوری سەرپەرشتیاری ئیدارەی گەرمیان ئەوەی خستەڕوو، لە سنوری ئیدارەی گەرمیان ژمارەیەک کارگەی پیشەسازی گەورە هەن بەرهەمەکانیان دەنێرنە پارێزگاکانی عێراق، باسی لەوەشکرد ئیدارەی گەرمیان کاردەکات بۆ ئەوەی لە داهاتوودا کارگەی زیاتر لە سنورەکە دابنرێت و هەوڵ بدرێت هاوردەکردنی پێداویستی کەم بکرێتەوە.