ئەمڕۆ (٦ی ئایاری ٢٠٢٥) ستافی رێکخراوی هاوکاری ئەڵمانی و رێکخەرانی کۆنفرانسی گەنجان کە لەماوەی رابردوودا لە گەرمیان ئەنجامدرا، سەردانی ئیدارەی گەرمیانیان کرد.

لەو سەردانەدا، سوپاسی سەرپەرشتیاری ئیدارەی گەرمیان و دامودەزگاکانی حکومەتیان کرد کە لەماوەی رابردوودا هاوکاریان بوون بۆ سازدانی کۆنفرانسی گەنجان لە گەرمیان، هاوکات راسپاردەی کۆنفرانسەکەشیان رادەستی ئیدارەی گەرمیان کرد و داوایانکرد کاری لەسەر بکرێت.

لای خۆشیەوە، جەلال شێخ نوری سەرپەرشتیاری ئیدارەی گەرمیان، ووتی، گەنجان توێژێکی گرنگ و پڕ بایەخی کۆمەڵگەن و ئێمە لە ئیدارەی گەرمیان بە گرنگیەوە لە ووزە و توانای گەنجانمان دەڕوانین و هاوکار و پشتیوانیان دەبین بۆ ئەوەی بتوانن رۆڵ ببینن لە خزمەتکردنی ووڵاتەکەمان.

ووتیشی، سازدانی هەر کۆنفرانس و چالاککیەکی تایبەت بە توێژی گەنجان گرنگە و ئێمە پشتیوانی ئەو چالاکیانە دەبین، سەبارەت بە کۆنفرانسەکەشتان بە گرنگیەوە لە راسپاردەکانی دەڕوانین و کاری لەسەر دەکەین.